مدارس المتفوقين للعلوم والتكنولوجيا أو مدارس STEM ليست لها علاقة بمدينة زويل واسمها ليس مدرسة زويل، وايضا المدرسة ليست لها علاقة بمدرسة متفوقين عين شمس لأن عين شمس ثانوية مصرية عادية بشوية زيادات في المنهج لكن STEM بتكون شهادة تانية تمامًا اسمها الثانوية المصرية في العلوم والتكنولوجيا - أولا STEM دي اختصار لـScience, Technology, Engineering, and Mathematics .
- شروط التقديم ان الطالب يكون جايب 98% فأكثر في تالتة اعدادي والدرجة النهائية في مادتين على الأقل من (الرياضيات والعلوم والإنجليزي) – السنه الى فاتت نزل المجموع ل 95% مع وجود شرط تقفيل المادتين - وانك تكون من مدرسة تابعة للتربية والتعليم سواء حكومي أو خاص أو تجريبي .. والمدرسة مبتقبلش طلاب الأزهري - الناس المنطبق عليها شروط التقديم بيدخلوا امتحان القبول واللي بيكون متكوّن من علوم ورياضيات وأسئلة مهارات ذهنية وذكاء و ده هينزلو تدريبات على الصفحه هنا بمجرد بدا التقديم و اعلان الشروط المدرسة بدأت بأول مدرسة للبنين في أكتوبر وأول مدرسة بنات في المعادي لحد السنة اللي فاتت لكن اتعمل 7 مدارس جديدة مشتركة متوزعة على محافظات كفرالشيخ، الإسكندرية، الغردقة، الدقهلية،الإسماعيلية، أسيوط، الأقصر.. وبعد امتحان القبول بيوزّعوا الطلاب حسب درجاتهم في الإمتحان، يعني بيبقى ليك رغبه اولى محافظتك الى انت متوزع علها اقليمى و التانيه انت بتحددها - اللغة مش أزمة كبيرة أوي يعني ناس كتيره من الى دخلوها كانو مدارس عربى ومع الوقت بتتعود على انك تدرس كل المواد انجلش، يعني ممكن بس تحتاج مجهود زيادة أول تيرم والدنيا بعد كده هتظبط - بالنسبة للمصاريف الاول كانت منحة دراسية، دلوقتي بقت بـ3 آلاف جنيه أول السنة شاملة تأمين اللاب، ولما بتخرج من المدرسة بترجعه وتاخد الألفين جنيه بتوع التأمين وتسيبلهم 1000 .. ومحدش يسألني اشمعنا عشان أنا نفسي مش فاهمة ليه مسابوهاش ببلاش بدل قلة القيمة !
- نظام المدرسة هو السكن الداخلي حتى لو أنت من منطقة قريبة منها، يعني لو أنت من اسكندرية وتقدر ترجع البيت كل يوم لازم برضه تقيم في المدرسة في برج العرب وترجع البيت نهاية الأسبوع .. أكتوبر بنين بس والمعادي بنات بس وباقي ال7 مدارس مشتركة ولكن بسكن منفصل
- المدرسة علمي بس مفيهاش أدبي، يعني من سنة أولى هتدرس كل المواد العلمية (Pure Maths, Mechanics, Biology, Geology, Chemistry, Physics, Computer Science) وزائد عليهم بعض المواد الأدبية اللازمة زي العربي والانجلش واللغة الأجنبية التانية اللي بتكون غالبًا فرنساوي أو ألماني ده غير التربية الوطنية والدين والدراسات الإجتماعية شاملة التاريخ والجغرافيا، ومواد زي الـ Electronics, Robotics وهتعرفوها لما تدخلوا يعني لأنها بتتغير من سنة لسنة - بتختار تتخصص علمي علوم أو علمي رياضة في تالتة، العربي والإنجلش واللغة الأجنبية التانية والتربية الوطنية والدين ثابتين لكل الناس، علمي علوم بياخدوا زيادة عليهم بيولوجي وجيولوجي وعلمي رياضة بياخدوا بحتة وتطبيقية - الدراسة في أولى وتانية بتكون متوزعة 60% على الCapstone وده مشروع جماعي بيعمله الطلاب كل تيرم لحل مشكلة بتحددها المدرسة ليهم زي الطاقة أو تلوث المياه أو التكدس السكاني .. وده بيكون مطلوب فيه من الطلاب إيجاد حل ممكن يكون اختراع جديد أو ممكن فكرة قديمة عملوا عليها تعديل قلل تكلفتها أو زوّد كفائتها .. وبيكون 30% على امتحانات التحريري في الفاينال و10% عملي وأعمال سنة بقى على الغياب والPresentations والreports اللي بيطلبها المدرسين في كل مادة - الدراسة في تالتة بيكون المشروع عليه 20% والعملي عليه 10% وأعمال السنة 10% وامتحانات الفاينال التحريري بتاع المواد العلمية بيكون20% وفي امتحان عليه 40% اسمه ACT (American College Test) واللي الوزارة غيرت اسمه مؤخرًا وبقى اسمه URT ، أما العربي والفرنساوي أو الألماني بيكون الامتحان ورقتين، واحدة زي بتاعة الثانوية العامة بيكون عليها 40% وورقة بتكون اسمها مقاييس مفاهيم حاجات متنوعة في اللغة بتقيس درجة مهارتك فيها ومش شرط تمامًا تكون من المنهج وبيكون عليها 30% والمشروع طبعا داخل بنسبته 20% و أعمال سنة 10% - مستقبل المدرسة مش هتكلم عن المنح لأنها بتتغير من سنة للتانية يعني حسب ميزانية المؤسسات زي مصر الخير وبنك مصر، فخلينا نتكلم عن التنسيق الحكومي لأنه الثابت الوحيد، طالب STEM متاح له يدخل 7 كليات علمية عملية بس، اللي هم طب وأسنان وصيدلة وبيطري لعلمي علوم وهندسة وحاسبات لعلمي رياضة وكلية علوم لعلمي علوم وعلمي رياضة.. التنسيق بيكون بنظام النسبة المرنة .. يعني ايه ؟
ببساطة بيجمعوا عدد طلاب ستيم في كل المدارس ويقسموه على عدد الطلاب اللي داخلين نفس ال7 كليات العلمية العملية في كل الجمهورية من ثانوية عامة، بيطلع نسبة زي مثلا 2 في الألف أو 3 في الألف حسب ظروف كل سنة، وده معناه ان لكل ألف طالب من بره بيدخل اتنين أو تلاتة من عندنا وده مع جبر الكسر للعدد الأعلى ، وده له ميزة وله عيب، له ميزة لو النسبة بتاعتكم مثلا طلعت 3.1 هتترفع تبقى 4 في الألف ..لكن له عيب لو النسبة طلعت 2.9 لأنها هتتجبر 3 في الألف بس .. وفي النهاية لازم هتدخل كلية من ال7 دول مفيش حد مبيدخلش كلية متقلقوش :D - جامعة زويل بتاخد من الثاتوية العامة اللي جايب فوق 80% وطبعا بيدخل امتحانات القبول ويمر بنفس مراحل التقديم من امتحان وانترفيو - رأيي أنا الشخصي اللي الناس بتسألني يكملوا فيها ولا هي مخاطرة، أنا رأيي ان المدرسة فرصة كويسة انك تعرف حاجات وناس جديدة، ولو بعد تانية حسيت انك عايز كلية بعينها وترتيبك في المدرسة مش هيخليك تجيبها أو صعب تجيبها في STEM بس أسهل لو طلعت ثانوية عامة يبقى امشي بعد تانية، لو بعد تانية حسيت ان مش فارق معاك كلية بعينها أو لو أنت حاسم الصراع من البداية انك عايز حاسبات أو علوم يبقى كمل في المدرسة وابني دماغك لو شايف ان فيها فايدة ليك ، لأن ببساطة أنت ممكن تحوّل من STEM لثانوية عامة بس مش هتقدر تحوّل من ثانوية عامة لـSTEM - وأخيرًا المدرسة مبتطلعش علماء ولا أحمد زويل الصغير ولا فاروق الباز الكبير ولا الهري ده، أنت اللي بتقرر هتعمل ايه والمسابقات أنت اللي بتشارك فيها المدرسة مبتخليش حد يكسب في مسابقة ولا بتدخّل حد مسابقة، كل الموضوع ان المدرسة بتحط الطالب في ضغوط وظروف تبني شخصيته بطريقة معينة هيكتشفها لما يدخل الجامعة لما يعرف ان الدنيا حلوة سكّر واللي جاي من ثانوية عامة بيكون مخضوض ولسه بيجرب احساس الضغط ده لأول مرة .
